Enn ein skúlavitjan á Veðurstovuni

Gott 30 næmingar umframt lærararnir frá Eysturskúlanum í Havn vitjaðu á Veðurstovuni í Havn mikudagin. Á Veðurstovuni er einki høli, sum rúmar so nógvum fólkum í senn. Tey vórðu tí býtt upp í 3 bólkar, sum gingu til ymsar framløgur í trimum ymsum hølum á stovninum. Tað eina var sjónvarpsupptøkuhølið, sum eisini er bæði fundar- og matarhøli, har tey fingu at vita um stovnin og veðurtænastuna. Í einum øðrum høli varð greitt frá um havmyndlar og brúk av teimum, sum er ávegis. Seinasti steðgur var í bállón-bingjuni, sum stendur í túninum við Veðurstovuni, har tey sóu og fingu frágreiðingar um radio-sondir og vindmátara.

Høvuðshendingin var, tá veðurballónin fór upp úr bingjuni. Hetta er sjálvirkandi skipan, sum hvønn dag kl 12:04 nú um summari sleppur eina bállón við mátitólum. Um veturin hendir hetta kl 11:04. Í góða veðrinum, sum var mikudagin, bar til at síggja ballónina til hon var rættuligt høgt uppi. Henda bállónin fór við vindinum í ein landnyrðing, sum lýst á myndini og í talvuni undir, og brast uppi í 27.929m hædd lítlan tíma eftir at hon varð slept.

Mátingarnar, sum á henda hátt verða gjørdar upp gjøgnum loftløgini, verða sendar frá mátitólinum undir ballónini og niður til samskiftisútgerð í bingjuni, og síðani beinleiðis til aðrar veðurstøðir kring heimin umvegis alheims veðurstovnin WMO. Slíkar mátingar eru, saman við mátingum frá fylgissveinum frá í erva, og mátistøðir á landi og sjógvi í neðra, avgerandi fyri at veðurmyndlarnir eru so neyvir, sum til ber. Stutt eftir at bállónini er brostin eru mátingarnar tøkar hjá øðrum at brúka, m.a. av nógv brúktu appini Windy, og soleiðis atkomulig hjá almenninginum.

Skúlaflokkar eru javnan á vitjan á Veðurstovuni og er hetta ein liður hjá stovninum at menna almennu tilvitanina um veður- og havfrøði. Eisini er sjálvsøkna vónin hjá stovninum at kveikja ein neista hjá teimum ungu fyri hesum fakunum, soleiðis at Veðurstovnan verður væl mannað framyvir.